أنا البحر اللى مات غرقان
أنا الفرح اللى بات زعلان
أنا الحضن اللى بيطمن
لكن عمره ما عاش فــ أمان
أنا الإيد اللى بتطبطب
أنا اللّمة اللى بتقرب
أنا الغصن اللى بيجرب
يمد فروعه ع الجدران
———————–
أنا العمر اللى فات تخاطيف
أنا الضحكة أم دم خفيف
أنا اللون اللى زى الطيف
شايل جواه 7 ألوان
أنا الحلم اللى لسه بعيد
أنا الميتم فــ يوم العيد
أنا العايش تملى وحيد
ما بين الأهل و الخِلان
———————–
أنا الواحد اللى ملهوش زىّ
أنا الجرح اللى من غير آىّ
أنا القطر اللى رايح جاىّ
فــ نفس السكة و القضبان
———————–
أنا الضى اللى بينوّر
أنا الصدق اللى بيحوّر
أنا الصبر اللى بيدوّر
على الفرحة بين الأحزان
———————–
أنا الحب اللى بيفرّح
أنا الورد اللى بيفتّح
أنا الشوك اللى بيجرّح
إيدين الحاسد الشمتان
———————–
أنا الحاضر و أنا الماضى
أنا المليان و أنا الفاضى
أنا اللى بالعذاب راضى
و برجو العفو و الغفران
———————–
أنا القيصر و أنا الهلفوت
أنا العيشة بطعم الموت
أنا اللى كلامى كله سكوت
و عقلى الفذّ كله جنان
———————–
أنا العالِم و أنا الجاهل
أنا الصعب اللى بالساهل
أنا القلب اللى يستاهل
عشان طيب أوى و غلبان
———————–
أنا المحتار و أنا المسكين
أنا الطير اللى كله حنين
يهاجر تانى زى زمان

اعتذر أن بعض المواقع نشرتها باسمي
محمد عبد السيد

شارك الخبر:

ماذا تقول أنت؟

لن يتم نشر عنوان بريدك الإلكتروني. الحقول الإلزامية مشار إليها بـ *