الى نورت والمعلقين‎(مهم)‎

إزايك يا مُصطفى ؟ عامل إيه ؟ يارب بخير أنت والجميع إن شاء الله .
و أنا رأيى قولته إمبارح فى موضوع الأخت Nada Lebanon وهو غنى مع التغيير و لأكتر من سبب .
أول حاجة إن نورت يا إخوانا لها سيادتها ومش معنى إننا أعضاء قدامى أو جدد إننا نتدخل فى تطورها أو الشكل إللى بتمارس بيه إدارتها ! وهى زى ما هى جريدة إلكترونية ولها أعضاء و معجبين بتعمل حسابهم وبتلبى طلباتهم بردو هى ليها إهتمامات مادية ولها كامل الحق فى تطوير نفسها لجذب مناديب التسويق للإعلان عليها و إلا ما حدش هيعبرها لو فضلت بالشكل التقليدى دون تغيير وكل إللى حواليها بيتغير وبيتجدد !
إنت بتسمع للمطرب الفولانى أو بتتفرج على الممثل العلاّنى علشان بيعجبك إللى بيقدمه وليس إللى بيلبسه ! طب تخيل لقيت المطرب المفضل ليك مغيّر تسريحة شعره أو حتى لابس بنطلون أحمر هل ليك الحق إنك تقوله ( إقلعه ) أو إرجع لشكلك القديم ؟! بالطبع لأ
وزى ماليك منه إللى بيقدمه ، برده ليك عند نورت إللى بتقدمهولك وده إللى ليك الحق تتكلم عليه وتطالبها بتغييره .
كلنا أو معظمنا بيشتغل Computrized فى شغله ، يبقى أكيد جربنا نشتغل على Microsoft Office 2003 طب يا ترى لما جربنا Microsoft Office 2010 كان إيه الإنطباع ؟ اكيد توهنا وملينا لحد متعودنا ، بس هل يا ترى حد مننا عمله Remove من على جهازه ورجع للتطبيق القديم بتاع 2003 ؟ أكيد لأ ، ليه لأن هيلاقى إللى حواليه بيتقدم حتى لو هو إختار يفضل عند نفس النقطه ويقف !
نفس الشئ على ويندوس XP و ويندوز 7 …………. يا جماعة هى عملية تعود مش أكتر .
أما بالنسبة لنقاط التعديل هقول عليها إنما فى الموضوع التانى إللى نورت طلبت منّا فيه نقول ملاحظتنا على التعديل .
شكراً أخى مُصطفى وتقبل مرورى 🙂