خالتى تحية
مش مجرد ست عادية
ومن امتى الست المصرية ست عادية
طول عمرها بألف
ولا تعرف خوف ولا تعرف ضعف
تخاف على بيتها وعيالها
وتسمع كلام راجلها
ولا تشمت فيه ولا فيها حد
ست يحلف بيها التاريخ
يحلف على حق
ماهو مين اللى يختشى م الحق
وخالتى تحية جوه دارها مدراية
مشغولة فى البيت والعيال
ميهمهاش مين حكى ومين قال
يا بنى خلينا ف حالنا
كل حى وله موال
ودايما تصحى م الفجرية
تأكل فراخها
وتسقى بهايمها
وتحضر الفطار
وتبتدى حصة النقار
قومى يا بنت اصحى يا واد
ماتغلبونيش
ده اللى يغلب أمه يخش النار
اصحوا الجرس ضرب
والشمس ملت الدار
يا عيال اصحوا خلص النهار
اصحوا خليكوا شطار
خالتى تحية تحس انها ف دنيا لوحدها
وعمره ما يخلص صبرها
ومالهاش دعوة بحد
حتى لو قدام دارها ألف
وفى المندرة ميه
مشغولة ببيتها ملكوتها
وربك منور بصيرتها
ماهى لاتبطرت مرة
ولا كرهت مرة عيشتها
أحسن من غيرنا كتير أقله
بناكل كل جمعة فطير
وعندنا فرشة وسرير
ربنا يكون عون الغلابة
ده فى اللى مش لاقيين حق الطعمية
وتبوس ايدها وش وضهر
وتقوم تصلى الضهر
ولو غابت عن الصالة شوية
تلاقها ف أوضة جوانية
تسأل سؤالها اللى مالوش أخر
يا ترى أطبخ ايه
والفلوس هتقضى
ومعاى كام جنيه
وتسرح
العيال اشتاقوا للزفر
كلها شهر والطير يكبر
والخير يبقى مطر
ابوهم فلاح غلبان
وده النصيب وده القدر
وتفتكر تسرح تانى
الواد الكبير عاوز جزمة
اه منه ابو مخ جزمة
كل يوم يعيط ويعمل لمة
وأبوه مفلس معاهوش
يادى الحوسة ويادى الأزمة
والمضروبة عاوزة توكة وشنطة
تتعايق وتغيظ بطة
وانا لوقلت لابوها
لا مش هأقوله
الجدع مش ناقص نقطة
يادى الشيلة ويادى الحطة
اه يا زمن
امتى هتجرى
وتعدى بحر المحن
ونفرح بعد الشقى
ونغنى بعد الشجن
تعرف نفسى قبل ما أموت أحج
بس الأول أجوز العيال
تفتكر هيجى اليوم ده يا واد
ويبقى لنا مع السعد معاد
ياه ده انا ساعتها
يمكن اموت م الفرحة
أما شوف نوسة لبسة الطرحة
عارف قرب هنا لا الحيط يسمعنا
حلمت عمن اول
انى راكبة عربية
ومعاى فلوس كتير
وعندى مية جلبية
اوعى اياك تحكى الحلم لحد
عارف انك عاقل
بس برضه
مش عاوزة مشاكل
خلى سرى ف بير
لجوزى يقول اتجننت
وهتلبس طراطير
ياه ده الليل دخل
تتعشى معاى
عندى جبنة وجرجير
فضل ونعمة وخيره كتير
وتزغدنى ف كتفى وتكمل
سبنى أحلم هى الاحلام بفلوس
يمكن الحظ يصادف مرة المتعوس
والبخت يجيله بألف فانوس
الا صحيح قولى يا محروس
أمك بقالها جمعتين ما طلتش
على رجليها نقش الحنة
طب انا مشغولة وايدى مش فاضية
وهى قاعدة عايقة ورايقة
قولى بس وراه ايه
تهجر بيتى ما تبص عليه
يارب تكبر يا ابن أختى واشوفك بيه
مش زى ابن شوقية جته ايه
عشان مسك الورقة ام جنيه
من يومها ما طل على
ولا ندرته يوم بعنيه
ربنا يسهله بس برضه زعلانة منه
المهم اخبارك ايه
وكنت جاى ف ايه
وده كان حال خالتى تحية زمان
ايام ما كانت نص الحاجة شكك م الدكان
دلوقتى العيال كبرو وراحوا اطاليا
ومسكت الورق ابو ميه
وتهزر مع الجارة معاكى فكة 100 يورو
يووووه دورى كويس يا وليه
والحال اخر تمام
والدهب ف ايدها لحد الكيعان
ونسيت الحزن
وبتضحك على دى ايام
وتغمزنى
شفت عزال نوسة
غظت بيه الاعادى والجيران
والكفر مشى يكلم نفسه
ويقول ده شغل جنان
ربك خيره كتير
ليه ابخل على بنتى
وابيت جوزها زعلان
وناوية اطلع الحج كل عام
واطلع عمرة رمضان
وازور النبى العدنان
عليه الصلاة والسلام
واخد الرجل معاى كمان
حقه يفرح بقى
طول عمره شقيان
صحيح الزكى بيطلع امتى
قصدى ف شهر كام
وعاوزة اتبرع للأيتام
صحيح يا عين خالتك تتعشى
ما تقوليش شبعان
داسة رز وحاشية حمام
واكل خسارة
يابنت
هاتى الخوخ والرمان
والكيكة وبلح الشام
اجيب لك رز بلبن فى والله كمان
كله من خير الرحمن
بصراحة مقدرتش امسك روحى
وفاض بى وطلعت روحى
م الضحك انا زوران
فضحكت لما شبعت
وقلت الله عليكى يا خالتى
والله زمان
غضبت بسرعة وقالت
اخص عليك يا جبان
بتعايرنى بليالى زمان
وتفكرنى باللى كان
امشى قوم من هنا
يابت انتى يابت
هاتى دوا النسيان
الواد عكر دمى
اه منه ابن الايه
لو يعرف بحبه قد ايه
وانه ساكن دمى
سمعتها وانا خارج
قلت متزعليش
وانا والنعمة كمان
كلمات
احمد صلاح محمود
الله الله عليك..مصرى اصيل
جميلة يا استاذ احمد، بجد روعة.
شكرا على الموضوع واحلى تحية لاحلى خالة تحية.
روعه يا استاذ احمد
شكرا ليك
الله بجد يا احمد
بجد حلوة جداجدا جدا جدا
تسلم ايدك يا جميل
hahahahahaha mahdomi
شكرا لكم اصدقائى الاعزاء
دائما كلامك جميل
انت رائع ياحمودة ..
تسلم ايدك يا أحمد مع اني لست من محبي الشعر المحكي لكنك جعلتني أحب قراءته باسلوبك الممتع السلس …
go ahead
بسيطة ,جميلة,ومؤثرة….!! شعرت اني كنت في زيارة لخالتك تحية…اللي صارت غنية!!!!ههههه شكراً استاذ احمد صلاح….!!
كلمات جميلة يا أبو صلاح ،
خرجت من عمق الأرض المصرية
ومغلفة باللغة الاصيلة ، لغة الفلاح الاصيل
سحر الكلمات من أبسط المعانى
سارسل تحياتى لاثنين
تحية خاصة لك ، والأخرى للخالة تحية
كم هي جميلة هده القصيدة ورائعة يا استاد احمد صلاح محمود…
جميلة ببساطة مفرداتها ,, وبالحياة البسيطة المكافحة والسعيدة للخالة تحية…
الف تحية لك استاد احمد…وشكرا انك خصيتنا بابداعاتك.
مش عاجباك المقالات المنقولة يا المندر؟ وما الضير فيها ادا نقلت للنفع؟اليك هده المحاولة واعدك بالموضوعات المكتوبة عندما اكمل دراستي على خير وان امد الله في العمر…
———————–
تحية الى امي..
تزوجتي وكنت سعيدة بزواجك وانت في سن الزهور….
كيف لا؟ وزوجك كان خير الخلق الطهور….
تعلمت المكارم في مدرسة من نور….
فكنت لنا خير الام المحبة الصبور…
وعلى الافك الله اظهرك البرور…
من فوق سابع سماء نصرك الله النصور…
في كتاب الله في اية في سورة النور….
كرست حياتك لتعليمنا الدين الحق الجسور…
لك منا كل حب واحترام وحبور….
انتظر محاولاتك القادمة …مع تمنياتي لك بالتوفيق!!
جميله وبسيطه جمالها ببساطتها وكلماتها المعطرة بللهجه المصريه المحببه وكأنني اشاهد مسلسل تلفزيوني لأمينه رزق ..
مشكور أخ صلاح استمر.
برافو حنان بدايه جميله.. كمان استمري بس لا تعصبي
لولا ما بى من احزان لقلت ووصفت سعادتى
بعيد الشر عنك من الاحزان استاد احمد…وكل الله…هده الدنيا زوالة ولا دايم غير وجه الله….
الله يبعد عنك الاحزان ,,ويعوضك بما يفرح قلبك امين.
الحلف المحرم والغير مقبول فقط في اليمين الغموس اخ احمد يعني لما تحلف في محكمة او تكون شاهد او انك بدك الناس تصدقك ، لكن اليمين العادي فهو مكروه بس لكن مو حرام .
اشعر براحة عند قراءة كتاباتك .. لبساطتها وعذوبتها
يارب تزول احزانك وتكون كل ايامك افراح ومسرات ..
حتى تبسطنا باشعارك المفرحة ..
شكرا لك احمد صلاح ..