مهما تشوف فـ متاعب إوعى
تمشى فـ أي طريق ممنوع
أحسن نارك تصبح والعة
أحسن فرحك يبقى دموع
حاسب تنسى فـ يوم الخير
وإنسى تملى ليالى الشر
لما حـ يبقى فـ زمنك خير
قلبك مش حـ يدوق المر
قلبك مش حـ يبات موجوع
وإعرف إن بحبك دايما
صوتك راح يصبح مسموع
—————
لما تلاقى زمان الحب
تايه وسط قلوب الناس
حاول تكسر شوك الصعب
قبل ما يغرز فـ الإحساس
قبل ما تغرب شمس هواك
قبل ما يبدأ ليل اليأس
إنسى الحزن يقوم ينساك
وأما عيونك تنسى الأمس
مش حـ تلاقى لفجره رجوع
وإعرف إن بحبك دايما
صوتك راح يصبح مسموع
—————
وأصبر على أحزانك أصبر
يبعد عنك ضل الحزن
وإياك تيجى فـ مرة وتغدر
نار الغدر بتمحى الحسن
حافظ على أصلك ووعودك
يفرح زمنك دايما بيك
وإعزف أحلامك على عودك
تتفتح ليها الشبابيك
وتمهد قدامها ربوع
وإعرف إن بحبك دايما
صوتك راح يصبح مسموع
—————
داوم على صلواتك تسلم
إوعى تخالف أمر الله
أحسن على أعمالك تندم
ولا تلقاش غير قولة آه
رحمة ربك واسعة ورحبة
عمرك ما حـ تلقالها نهاية
صحبة ربك أجمل صحبة
صحبة تحقق ليك الغاية
وتقيدلك فـ الضلمة شموع
وإعرف وإعرف إننا دايما
صوتنا بإذن الله مسموع
=-=-=-=-=-=-=-=
بقلم : محمد حلمى مصطفى
الأسكندرية – جمهورية مصر العربية
=-=-=-=-=-=-=-=-=-=-=
لحظة تأمل !
ماذا تقول أنت؟
اللهم انى اعوذ بك من شر نفسى و من شر الشيطان و شركه و ان اقترف على نفسى سوءا او اجره الى مسلم
كلاااام جميل … شكرًا