مرسلة من صديقة نورت nor & salam

قال الطفل ذو السنوات الثلاث لوالده:
– بابا، مش إنت وماما بتقولوا إنى اتعلمت الكلام خلاص، وبقيت بعرف أتكلم؟
– أيوه. شاطر يا حبيبى.
– أقول إيه بعد ما اتعلمت الكلام يا بابا؟
– مش فاهم.
– قصدى احنا اتعلمنا الكلام عشان نعمل بيه إيه؟
– آه فهمت، حاجات كتير يا بنى. يعنى لما تعوز حاجة تقول.
– لما أعوز حاجة أقول؟
– آه.
– طيب أنا عاوز عجلة.
– لأ.
– مش إنت لسه قايل إنى لما أعوز حاجة أقول؟
– آه، بس ده مش معناه إنها حتجيلك.
– يبقى أنا استفدت إيه؟
– ولا حاجة.
– طيب وحاعمل إيه تانى بالكلام؟
– تعترض على الأوضاع الفاسدة.
– إزاى؟
– لما تكبر تكتب فى الصحف وتعارض التوريث.
– وأكتب إيه كمان؟
– تحارب الفساد، وتطلب تنضيف المدن ورفع الزبالة..حاجات كده يعنى.
– ولما أكتب فى الصحف حيحصل حاجة؟
– لأ.
– يبقى اكتب ليه إذا كان مش حيحصل حاجة؟
– معرفش.
– طب وحاعمل إيه تانى بالكلام؟
– لما تكبر، وتحب الستات تبقى تعاكسهم وبعدين تتجوزهم.
– هو أنا لما أكبر حاحب الستات؟
– آه، وما تسألنيش ليه؟، حكمة ربنا.
– وحأعاكسهم إزاى يا بابا؟
– والله يا بنى دى بتختلف.. حسب إحنا ربيناك كويس ولا لأ.
– إنتم ربتونى كويس يا بابا؟
– لأ.
– ولما أحب أعاكس ست أقول إيه؟
– بصراحة يا بنى أنا بقالى كتير ما عاكستش، لكن ممكن تقول إيه الحلاوة دى.
– (بصوت عال) ماما..إيه الحلاوة دى؟
– وطى صوتك يا حمار.
– ليه يا بابا؟ مش ماما ست؟
– أيوه ست، لكن مش أى ست تعاكسها.
– أمال أعاكس مين يا بابا؟
– ما تعاكس، أنا غلطان.
– طيب ولما أقول أنا عاوز أتجوز حاتجوز؟
– لأ طبعا.. لازم شقة وشبكة ومهر.
– لازم شقة وشبكة ومهر؟
– آه، وما تسألنيش فايدة الكلام إيه؟
– وإيه تانى يا بابا؟
– لما تتخرج فى الجامعة وتحب تشتغل تقول أنا عاوز أشتغل
– أقول أنا عاوز اشتغل؟
– آه، ومش حتشتغل
– مش حاشتغل عشان قلت إنى عاوز اشتغل؟
– لأ عشان معندكش واسطة.
– هو أنا معنديش واسطة يا بابا؟
– يخرب بيت اليوم اللى علمتك فيه الكلام، تصدق بالله، إنت خلتنى أحس إن الكلام ما لوش فايدة فعلا.
– الكلام ما لوش فايدة يا بابا؟
– آه
– يعنى أنا اتعلمت الكلام على الفاضى يا بابا؟
– آه
– عجيبة. مع إنى شايف العكس.
– إزاى؟
– أهو ناس بتفش غِلّها، وناس بتتسلى، وناس بتسترزق، وجرايد بتتباع.

شارك الخبر:

شارك برأيك

‫16 تعليق

  1. سلام
    هذا مقال كتبه د.أيمن الجندي لجريدة المصري اليوم في 2009
    ترى هل اختلفت فوائد الكلام بعد 2011؟

  2. شكرا اخت nor & salam فعلا مقال رائع وكنت قد قرأته قبلا في المصري اليوم … وحتى اني علقت عليه في ذلك الوقت هناك … الاطفال بصورة عامة يتمتعون بذكاء ونباهه ، ولكن مع الزمن ولتربيتهم الغير سليمة فكريا في المنزل وفي المدرسة وفي المجتمع يتراجع ذكاءهم رويدا بسبب عدم الرد المناسب على استفساراتهم ،،،! ويصبحوا في هذه الحالة خاملين ( الا من رحم ربي ) …

  3. اسئلة الأولاد تحرج !!
    وأسئلة الكبار تقتل!!…فما اجمل الصمت في علة المفردات .
    مشكورة نوور

  4. جميلة يا نور_ _ _ ضحكتيني حوارهم لذيذ
    ما أجمل الكلام في بعض الأوقات !!!
    وما أقساه في حالات أخري !!!
    كلمة تحيي وكلمة تقتل _ _ _ سبحان الله علي الفرق
    شكراً تسلم إيدك

  5. شكراً يا نور

    كتير استمتعت بقراءة الحوار
    يا ما وقفت بمواقف محرجه مع أسئلة أولادي
    يعني نحنا نبذل كل جهدنا عشان نعلٍّم أولادنا الكلام ولما بيتقنوه نطلب منهم الصمت

    دامت المحبه

  6. “” أهو ناس بتفش غِلّها، وناس بتتسلى، وناس بتسترزق، وجرايد بتتباع.””
    ربما زاد في 2011 .. وقنوات فضائية تتحكم بمصير بلدان ..

    شكراً يا نور .. موضوع جميل كالعادة ..

  7. شكرا نور على المقال الظريف………
    أنا متلهفة إمتى يكلمني ابني ………….
    أسئلة الأولاد الصغار محرجة لكن حلوة ,والأهم لا ينبغي الرد عليهم بالكذب إطلاقا……..

  8. سلام
    شكرا لجميع من أدلى برأيه في الموضوع، كل باسمه.
    أم ريان، لم أرك في موضوع:عايزة ورد يا ابراهيم؟أريد أن أعرف موقعك، مع الورد أم غيره، لأن القوارير خذلنني

  9. وعليكم السلام ورحمة الله و بركاته أختي نور
    أنا حروح أشوفه حالا

  10. nor & salam في حزيران 23rd, 2011 |
    عايزة ورد يا ابراهيم

    سلام يا نور

    ممكن شوفو أنا كمان؟
    تحت أي تصنيف؟

    دامت المحبه

ماذا تقول أنت؟

لن يتم نشر عنوان بريدك الإلكتروني. الحقول الإلزامية مشار إليها بـ *