علقت الفنانة ” ميار الببلاوي ” على ظهور الفنانة ” شيرين عبد الوهاب ” مؤخرا بوزن زائد خلال حفل إحيائها لحفل تخرج كلية طب الأسنان بجامعة مصر الدولية وتكريمها به .
وخرجت ميار الببلاوي بمقطع فيديو عبر حسابها على موقع التواصل الاجتماعي فيس بوك وجهت من خلاله عدة رسائل ونصائح إلى شيرين من أجل تخطي ما تمر به بسبب انفصالها وأزمتها مع زوجها السابق الفنان ” حسام حبيب ” .
فقالت ميار الببلاوي : ” أنا شفت الفنانة الكبيرة والنجمة شيرين عبد الوهاب وهي طالعة تتكرم من كام يوم .. شفت الفستان اللي هي لابساه، شفت الوزن اللي هي وصلتله .. انا مش عارفة في إيه، شيرين فوقي لنفسك وفوقي لأولادك ” .
وتابعت : ” الدنيا مبتقفش على أي راجل في العالم، اسأليني أنا .. كلنا اتصدمنا واتطلقنا وفشلنا وكلنا حبينا واتسابنا لكن يا حبيبتي إنتي مش ملك نفسك، إنتي ملك جمهورك بالفن اللي بتقدميه .. وقبل ما انتي ملك لجمهورك، إنتي مثل أعلى لبناتك ” .
وأضافت : ” بنتك اللي شايفاكي وانتي منهارة بالطريقة دي .. مينفعش تبعتيله رسالة إنك اتدمرتي أو إن إنتي من بعده زهدتي في الدنيا .. أنا بحبك يا شيرين وكان عندي ولد واتعرضت لنفس المواقف بتاعتك دي ” .
وواصلت ميار : ” اتطلقت ولوحدي ومعايا إبني وكنت متعلقة جدا بالشخص اللي أنا اتطلقت منه لكن الدنيا مشت واتجوزت أكتر من مرة ومفرقش معايا .. عارفة إن إنتي حبك كان جامد أوي وعلاقة كانت حلوة حبيبتي قومي واقفي واثبتي وجودك والبسي أحلى حاجة وارجعي تاني ظبطي وزنك” .
وأكملت : ” أنا امبارح اتخضيت لما شفت وزنك وطالعة بالطريقة دي .. شيرين ارجوكي بناتك كده هيتعقدوا يا إما لما يعرفوا واحد هيبقوا عبيد تحت رجلين الراجل اللي هيتجوزوه علشان ميشوفوش الوجع اللي شايفينك فيه يا إما مش هيدخلو في أي علاقة خالص ” .
واختتمت الفنانة ميار الببلاوي حديثها : ” بصي احنا مستنيينك، مستنيين شيرين بتاعتنا اللي بنحبها، شيرين اللي بتفرز فن، شيرين الجدعة المصرية الأصيلة اللي بتاخد الخبطة وتقف تاني ب 100 راجل .. ربنا معاكي ويهدي قلبك وتعدي المرحلة دي بعون الله وبصتك لبناتك بالدنيا ” .