>

مرسلة من صديقة الموقع koky adel

قال الطفل ذو السنوات الثلاث لوالده:

– بابا، مش إنت وماما بتقولوا إنى اتعلمت الكلام خلاص، وبقيت بعرف أتكلم؟

– أيوه. شاطر يا حبيبى.

– أقول إيه بعد ما اتعلمت الكلام يا بابا؟

– مش فاهم.

– قصدى احنا اتعلمنا الكلام عشان نعمل بيه إيه؟

– آه فهمت، حاجات كتير يا بنى. يعنى لما تعوز حاجة تقول.

– لما أعوز حاجة أقول؟

– آه.

– طيب أنا عاوز عجلة.

– لأ.

– مش إنت لسه قايل إنى لما أعوز حاجة أقول؟

– آه، بس ده مش معناه إنها حتجيلك.

– يبقى أنا استفدت إيه؟

– ولا حاجة.

– طيب وحاعمل إيه تانى بالكلام؟

– تعترض على الأوضاع اللى مش عاجباك.

– إزاى؟

– لما تكبر تكتب فى الصحف وترسل لنورت.

– وأكتب إيه كمان؟

– تحارب الفساد، وتطلب تنضيف المدن ورفع الزبالة..حاجات كده يعنى.

– ولما أكتب فى الصحف حيحصل حاجة؟

– غالبا ودائما لا

– يبقى اكتب ليه إذا كان مش حيحصل حاجة؟

– معرفش.

– طب وحاعمل إيه تانى بالكلام؟

– لما تكبر، وتحب الستات تبقى تعاكسهم وبعدين تتجوزهم.

– هو أنا لما أكبر حاحب الستات؟

– آه، وما تسألنيش ليه؟، حكمة ربنا.

– وحأعاكسهم إزاى يا بابا؟

– والله يا بنى دى بتختلف.. حسب إحنا ربيناك كويس ولا لأ.

– إنتم ربتونى كويس يا بابا؟

– لأ.

– ولما أحب أعاكس ست أقول إيه؟

– بصراحة يا بنى أنا بقالى كتير ما عاكستش، لكن ممكن تقول إيه الحلاوة دى.

– (بصوت عال) ماما..إيه الحلاوة دى؟

– وطى صوتك يا حمار.

– ليه يا بابا؟ مش ماما ست؟

– أيوه ست، لكن مش أى ست تعاكسها.

– أمال أعاكس مين يا بابا؟

– ما تعاكس، أنا غلطان.

– طيب ولما أقول أنا عاوز أتجوز حاتجوز؟

– لأ طبعا.. لازم شقة وشبكة ومهر.

– لازم شقة وشبكة ومهر؟

– آه، وما تسألنيش فايدة الكلام إيه؟

– وإيه تانى يا بابا؟

– لما تتخرج فى الجامعة وتحب تشتغل تقول أنا عاوز أشتغل

– أقول أنا عاوز اشتغل؟

– آه، ومش حتشتغل

– مش حاشتغل عشان قلت إنى عاوز اشتغل؟

– لأ عشان معندكش واسطة.

– هو أنا معنديش واسطة يا بابا؟

– يخرب بيت اليوم اللى علمتك فيه الكلام، تصدق بالله، إنت خلتنى أحس إن الكلام ما لوش فايدة فعلا.

– الكلام ما لوش فايدة يا بابا؟

– آه

– يعنى أنا اتعلمت الكلام على الفاضى يا بابا؟

– آه

– عجيبة. مع إنى شايف العكس.

– إزاى؟

– أهو ناس بتفش غِلّها، وناس بتتسلى، وناس بتسترزق، وجرايد بتتباع.

نورث سامي

كاتب ومحرر في موقع جريدة نورت

شارك برأيك

‫18 تعليق

  1. خير الكلام ما قل ودل ء أهو ناس بتفش غِلّها، وناس بتتسلى، وناس بتسترزق، وجرايد بتتباع.

  2. اي والله بالنهايه جرايد بتتباع . ولو تتحول تكاليفها كانفاق كانت افضل .

  3. اخت koky عذرا للسؤال ..
    هل انت من كتبت هذه القصة الصغيرة .؟.
    ارجو المعذرة من سؤالي , سأحتفظ بالتعليق بعد اجابتك .

  4. ابوة ياخ قاسيون
    انا اللى كاتبة هذا الحوالر
    ودة من باب النقد على الاوضاع
    بس نقد غير مكشوف
    الموضوع مش الولد وابوة
    واغلب حواراتى من تاليفى
    وانا ارسلت ايضا نصيحة من فتاة عربية وكانت ح تعجبكم ولكن نورت لم تنشرها حتى الان

  5. عزيزتي koky ..
    شكرا لردك وأتمنى ان نرى مفالتك التي قلت عنها..
    لدي سؤال ليس شخصياً وهو : هل تعرفين أو قرأت للدكتور أيمن الجندي ؟

  6. كوكي هيدا الحوار يلي كاتبه
    الدكتور ايمن الجندي
    ما فيه داعي تلفي وتدوري قولي منقوووووووووووووووووووول
    منقووووووووووووووووووول

  7. سوزي كيفك عزيزتي…
    هناك تحصل كثيرا تشابه في النصوص من كثرة مانقرأ..فلا داعي للاتهام ..
    حتى لو كان منقولا..ل koky الشكر ..والموضوع لايفقد أهميته .

  8. هههههههههههههههههه لا التشابه مش لهاي الدرجه
    انا ما بحب الف والدوران كتير يعني يا ابيض يا اسود
    ما بحب حدا يشوف حالو بشي مش هو عاملو
    يعني انا اعوذبالله من كلمه انا بكتب منقووووووول

  9. اوكي شكرا كوكي عشان الموضوع يلي اخترتيه كتير حلو ومهم
    والله هل الدكتور يلي كاتب الموضوع بيفهم كتير

  10. باي لازم روح ضروري كوكي ما تزعلي مني
    انا هيك بس كمان ما كان لازم احكي باي قاسيون حسسني بالذنب

  11. شوفها على صفحتى ياخ قاسيون فى البيرف سبوت
    من سنتين
    وكذلك على مدونتى

  12. ولية ممكن ايمن الجندى أخدها منك بتحصل كتير مش اول مرة لانك متواضعة يا كوكي مش عارفين انت مين

  13. لازم بجد تشوفي حل لانة للأسف ظاهرة السرقة منتشرة حتي في انجلترا لازم تسجلي كل كلمة للحماية

ماذا تقول أنت؟

لن يتم نشر عنوان بريدك الإلكتروني. الحقول الإلزامية مشار إليها بـ *