قام مجموعة من الفنانين بتوجيه رسالة إلى المنتخب المصري لتشجيعه وتحفيزه على خوض المباراة الهامة بينه وبين منتخب الجزائر في التصفيات النهائية لكأس العالم.

حيث قال خالد سليم: “بقول لكل الجمهور المصري يلا كلنا نقول يا رب وإن شاء الله نفوز في المباراة اللي جاية مع الجزائر، وعايزين نشجع فريقنا من كل قلبنا وبكل إحساسنا وعايزين نوري العالم كله إننا شعب متحضر جداً وبرضه متعصب جدا للكرة المصرية والمنتخب المصري، بقول لكل لاعبي المنتخب المصري إحنا كلنا قلوبنا معاكم، بدمنا وبروحنا وبكل نفس بيطلع من قلبنا بنقول يا رب، وبنقولكوا إنكم إن شاء الله إن شاء الله khaled salimهترفعوا راسنا وهتعملوا كل اللي تقدروا عليه عشان ترفعوا اسم مصر في أعلى مرتبة ومكان، بجد أنا متفائل جدا، وعندي ثقة كبيرة جدا جدا في منتخبنا المصري، وإن شاء الله هنكسب، ويارب يارب دايما كسبانين”.

أحمد عزمي: “إن شاء الله ربنا يوفقنا في ماتش الجزائر، وديه تبقى المحطة اللي نوصل بيها لكأس العالم بإذن الله، والجيل ده يستحق إنه مش بس يوصل إلى كأس العالم لكن بإذن الله هيقدر يحقق في كأس العالم حاجات أحلى كتير أوي من ما كنا نتوقع من منتخب مصر، وربنا يوفقنا وربنا يكرمنا، وفي إنتظار المباراة”.

أحمد فهمي: “أنا عايز أقول لمنتخب مصر يا رب يا رب إن شاء الله تكون سعادة الـ80 مليون على إيديكوا، أنا مش عايز أن أنقل ليكم الرهبة، ولكن أن عايز أقول لكل واحد من منتخب مصر إن فيه 80 مليون مصري بره مستنيين 14/11 ده بفارغ الصبر عشان ينبسطوا ويفرحوا وأتمنى إنشاء الله بإذن الله تكون السعادة على إيديكوا، طبعا ربنا الأول وبعدين على إيدين كل واحد فيكم، وأتمنى إن شاء الله إن يكون زيدان سايق هو وأبو تريكة ومتعب وعمرو زكي وكل المنتخب، وإن شاء الله نعمل فرحة لكل المصريين”.

حمادة هلال: “عايز أقولكم يا رجالة إنكم إن شاء الله قدها وقدود، إن شاء الله ربنا هيكرمكم آخر كرم لأن أنا قربت منكم وشفتكم واحد واحد، وما شاء الله كلكم قريبين من ربنا، ودعوات أمهاتكم ليكم عالية جدا، وصدقوني كل الناس بتدعيلكم جوه وبره مصر وفي كل حتة بتدعيلكم بالنجاح والتوفيق إن شاء الله لأن انتم بجد تستاهلوا إنكم تبقوا أبطال العالم بجد والله، وإن شاء الله كلنا هنغني “والله وعملوها الرجالة” في اليوم بإذن الله”.

محمد عدوية: “أنا بقول لمنتخب مصر ربنا يوفقهم يا رب جميعاً، وشدوا حيلكم إنتم أبطال ورجالة، ومصر طول عمرها مشرفانة ورافعة راسنا لفوق، وطبعا مش هوصي الكابتن محمد أبو تريكة، أنا بموت فيه وبعشقه، برضه بحب كل اللاعيبه بس محمد أبو تريكه ليه معزة خاصة عندي، وربنا يوفقهم في ماتش الجزائر ويرفعوا راسنا لفوق”.

محمد رحيم: “بقولهم بجد ربنا معاكم إن شاء الله ويوفقكم في الماتش اللي جاي ويحميكم بإذن الله، انتم بجد بتسعدونا، والشعب العظيم بتاعنا ده لو تعرفوا أد إيه لما بتكسبوا الناس بتفرح أد إيه في الشوارع، إحنا بننزل نرقص في الشارع، ربنا معاكم بجد، ويثبت خطاكم فعلاً، ونفضل مع بعض كلنا كفنانين ورياضيين ورسالتنا الأولى والأخيرة فعلا هى إسعاد الشعب الجميل بتاعنا”.

نادر حمدي: “يا شباب مصر، ربنا معاكم، كلنا واقفين وراكم بندعيلكم، وعايز أوصلكم حالة أنا عن نفسي كنت متابعها على اليوتيوب طول اليوم من النهار لحد بليل، اللي واضح إن الجزائر عايزين يستفزونا، وده الطابع بتاعهم العادي، وافتكر هيستلمونا في الماتش كله بالاستفزاز علشان نحاول نخرج بره الماتش علشان مانعرفش نلعب، فركزوا كويس في الماتش وحاولوا إن أي حد يعصبكوا خليكوا باردين زيهم بالظبط، هما هيعملوا معانا كده بالظبط، ديه الخطة اللي اعتقد انهم هيلعبوا بيها، الخطة مش لعب .. الخطة توقيف اللعب، فحاولوا تركزوا، ومحدش يتعصب لما حد يرمي الكرة بعيد والجو اللي انتم فاهمينه طبعا مش هقولكم عليه، وربنا يوفقكم، ومصر كلها واقفة وراكم بشكل لا تتخيلوه”.

راندا: “أنا بحبكم أوي، واحنا كلنا وراكم يا رجالة مصر، المهم انتوا بس تعملوا اللي عليكم، وماتخافوش، إن شاء الله إن شاء الله إن شاء الله هنكسب”

أكرم حسني “سيد أبو حفيظة”: “عايز أقول للعيبة منتخب مصر وكل الجمهور المصري إن فيه 80 مليون مصري مستنيين الفوز، وإن شاء الله هنفوز، عايز أقول لكل اللعيبة وكابتن حسن شحاته يا جماعة اعملوا اللي عليكم، النتيجة ديه بتاعة ربنا، المهم إننا نجتهد ونعمل اللي علينا، وأنا متأكد إن ربنا مش هيضيع مجهودنا أبداً، وبقول لكل الجمهور المصري يا جماعة مش قدامنا غير إننا ندعي، وإننا نكون جنب فريقنا، وأيا كانت النتيجة إحنا راضيين، وإن شاء الله إن شاء الله إن شاء الله الناس اللي هتروح تشجع المنتخب يوم 14 هما هما اللي هيروحوا يشجعوهم لما نروح كأس العالم”.

رامي صبري: “أولا كل سلامي لكل جمهور مصر وجمهور الوطن العربي، وجمهور مصر بالتحديد، أنا هتكلم في حاجة أنا شفتها بره، أنا لسه كنت في تونس وشفت الناس بتعاملنا إزاي هناك سواءً في تونس والجزائر والمغرب العربي كلهم طابع واحد وشخصية واحدة ومسلمين زينا وناس معندهمش مشاكل خالص، بس لو نتكلم تحديدا على ماتش مصر والجزائر يوم 14، الماتش طبعا مهم جدا وكلنا مستنيين إن إحنا نكسب وهم كمان مستنيين إنهم يكسبوا، وده شئ طبيعي، ماتش بسيط واحنا معندناش مشاكل ولا هما عندهم مشاكل، بس المشكلة في الناس اللي اتكلمت كلام غلط والصحافة كبرت الموضوع هنا عندنا وعندهم هناك، أنا نفسي منتكلمش غير في حاجة واحدة وهى اننا نقعد ندعي إن ربنا يكرمهم إننا نغلبهم ونكسب وهما يخسروا، وعلى فكرة مش فارقة هم يخسروا أو يكسبوا لأن احنا الاتنين واحد ودولتين مسلمين وبنحب بعض ومعندناش مشاكل مع بعض، بس يا ريت نهدا شوية أنا شخصيا شايف إن الماتش عادي جدا هنكسب هنخسر إيه المشكلة، عادي مش هنموت لو حتى خسرنا، بس كلنا ندعي ونقول يارب مصر تكسب بإذن الله ونتأهل لكأس العالم، لأن احنا محتاجين اننا نكسب لأن الناس محتاجة تشوف حاجة حلوة، وإحنا دايما عايزين حاجة حلوة عن طريق الماتشات .. عن طريق المنتخب .. عن طريق الرجالة اللي بيلعبوا في الملعب، احنا محتاجين نكسب عشان المشاكل اللي عندنا في مصر والحوادث محتاجين ان احنا نفرح شوية، وربنا يكرمنا ان شاء الله وبإذن الله هنخش كأس العالم”.

جنات: “كلنا بندعيلكوا، ومصر كلها وراكوا، كلنا مقدرين مجهوداتكوا في التجهيز للمباراة، بس أهم حاجة ان تركيزكم يكون على ان انتوا تلعبوا مباراة جامدة بجد، انكم تمتعونا، متحطوش نفسكم تحت ضغط انكم لازم تجيبوا أجوان، إن شاء الله ربنا معاكم وربنا يوفقكم”.

عمرو مصطفى: “شجعها .. قول مصر .. قول .. سمعها”.

شارك برأيك

‫14 تعليق

  1. القي بالتهنئة الحارة لمنتخب مصر بفوزه على منتخب الجزائر 2.0 والف 1000 1000 1000 1000 1000 مبروك والى الامام اخوكم من غزة الصمود

  2. المصري معروف بقوته وصموده ولو راينا ازاي المصريين بنوا الاهرامات حنعرف هد ايه ان منتخب مصر بازين الله قادر علي تحقيق اي نصر وكلمه مني للمعلم (حسن شحاته)ألف ألف ألف ألف ألف مليون مليون مبروك وعقبال ما نوصل بازن الله نهائي كأس العالم وده ان شاء الله حيصبح حقيقي مدام قلوبنا متعلقه بايمانا بالله وكيف قهرنا بطل العالم (ايطاليا) وكيف لعبنا مع بطل العالم خمس مرات (البرازيل )فا بازن الله قادرين اننا نهزم اي فريق مدمنا مؤمنين بالله والف الف ألف ألف ألف ألف مليون مليون مبروك

  3. انا بحب مصر جدا وبقول يارب مصر تكسب فى المونديال يارب وبحب أبوتريكة جدا وبدعليوا وتحياتى للاعبة كلها

  4. بحبك يا مصر ام نورا بتدعى لمصر ان ربنا ينصرها انشاء الله النصر لمصر

  5. نورا بوسى اسماء دينا دنيا محمد فايزه عبده ابراهيم محمد يا رب مصر تكسب النصررررررررررررررررررر لمصررررررررررررررررررر

  6. الحمد لله الحمد لك يا رب
    خدنا الكاس
    واحنا بنحب مصر
    وبنحب كل اللعيبة المصريين وبندعلهم
    ان ربنا يوقف معاهم والحمد لله
    كسبنا

  7. مبوووووووووووووووووووووووووووك لمصر وعقبال ميت سنه والكاس على طول مصرى وبحبك يا جدو وبحبك يا زيزو وبحبك يا متعب وبحبك يا حضرى ويا رب النصر لمصر على طول

  8. لمال تحب تجيب الجول كلام جدووووووووعلى التلفون مبرووووووووووووك لمصر يا رب النصر لمصر على طول اهم اهم اهم المصرين اهم الساد العالى عصام كمال الحضرى

    مبروووووووك لمصر

    مع تحيات عماد الهاشمى

  9. مبروك لمصر احلى منتخب فى تاريخ الكره المصريه 3بطولات على التوالى لم يسبق لاى منتخب تحقيقه

  10. مبرووووووووووووووووووووووووك لمصر ويا رب النصر على طول

    اهم اهم المصريين اهم اجامد ناس جدو متعب زيزو جمعه تركه معوض

  11. المنتخب ده خلانا عاجزين عن الكلام يكفى ان احنا ماعدناش بنخاف نهاجم زى زمان ومش مهم ان احنا ماوصلناش كاس عالم المهم ان احنا نتخب يشرف ويفرح ……….. مع تحياتى من الامارات محمد صبحى

ماذا تقول أنت؟

لن يتم نشر عنوان بريدك الإلكتروني. الحقول الإلزامية مشار إليها بـ *