شاركت الفنانة ” دنيا سمير غانم ” متابعيها عبر حسابها على إنستجرام بمجموعة من الصور من ظهورها يوم أمس الأحد في احتفالية ” قادرون باختلاف ” لأصحاب الهمم وذوي الاحتياجات الخاصة والتي أقيمت بحضور الرئيس ” عبد الفتاح السيسي ” .
وأعربت دنيا سمير غانم عن سعادتها البالغة بالمشاركة في تلك الاحتفالية والغناء أمام الرئيس المصري .. وحرصت على تقديم الشكر لكلا من الجمهور وزملائها من الفنانين الذين قدموا لها الدعم والتشجيع وإلى كل القائمين على الحفل .
فكتبت دنيا سمير غانم في تعليقها على الصور : ” تشرفت النهاردة بالغناء أمام سيادة الرئيس عبد الفتاح السيسي في احتفالية قادرون باختلاف وسعدت وتشرفت بكلامه ليا جدا وبنظرته اللى كلها أبوة ” .
وتابعت : ” احب أشكر الجمهور العظيم اللي دايما بيشجعني وشفت في عنيهم وفي ردود أفعالهم فرحتهم بوجودي في الحدث الهادف مع الملايكة اللي كانوا سبب في ثقتي بنفسي النهاردة بإحساسهم الصادق في تعبيرهم عن حبهم ليا الحمد لله وفرحتهم باليوم ده وان فى حد مهتم بيهم وبيفكر فيهم وفى احتياجاتهم ” .
وأضافت : ” بشكر كل الزملاء والأساتذة إللي اتشرفت إني كنت موجودة معاهم في نفس الحفلة وعلي رأسهم الموسيقار الكبير عمر خيرت وأستاذ أشرف عبد الباقي سعيدة جدا إني ابتديت يومي بتشجيعهم وحرصهم إنهم يطمنوا عليا قبل ما اطلع ” .
واستكملت دنيا : ” وكمان زملائي الأعزاء مصطفي شعبان ويوسف الشريف والمذيعين شريف مدكور وإيمان الحصري اللي مروا بظروف صعبة وعدوها بكل قوة وثبات بفضل ربنا ورحمته وكنت مبسوطة بيهم وحسيت بأد إيه أغلب الموجودين مننا كان عندهم تحديات في حياتهم زي الملايكة اللي استمدينا قوتنا منهم النهاردة ومن أهلهم الأبطال ” .
واستطردت : ” بشكر كل القائمين علي الاحتفال د/أمل مبدا الأم التانية للقادرون باختلاف .. فخورة جدا بأخويا هشام جمال لإنه اشتغل وتعب من قلبه في إخراج الحفلة والأغاني واختيار الأصوات اللي دخلت قلوبنا كلنا وعن نفسي بشكره علي أغنيتي “بلادي اسلمي” كلمات الشاعر الموهوب محمد إبراهيم وألحان العبقري المتنوع هشام جمال وتوزيع الموزع الشاطر جدا مادي ” .
واختتمت دنيا سمير غانم تعليقها بحديثها عن والديها الراحلين الفنان ” سمير غانم ” والفنانة ” دلال عبد العزيز ” مستذكرة مواقف لهم معها كما أعربت عن إشتياقها لهما .
فقالت : ” وفي النهاية حبايبي الغاليين بابي ومامي اتأثرت جدا النهاردة إني لأول مرة أروح في يوم مهم ليا من غير ما اسمعك يا مامي بتدعيلي أو ترقيني قبل ما أنزل أو بابي بيقول لي ربنا معاكي يا حبيب بابي .. يا رب أكون شرفتكم، بحبكم ووحشتوني أوي .. ربنا يرحمكم يا أغلي حاجة في حياتي ” .