وجه الإعلامي تامر أمين رسالة شديدة اللهجة للفنان محمد رمضان، بعد ظهوره عاري الصدر بحفله الغنائي بمدينة العلمين بالساحل الشمالي.
تامر أمين ينتقد محمد رمضان
وقال “أمين” من خلال برنامجه آخر النهار: “مش عارف إيه كيف القلع ده؟ أصل ده كيف.. ليه في كل حفله لازم أقلع؟.. الدنيا حر؟ ما هي حر علينا كلنا.. أجيلكوا هنا البرنامج ملط؟ يعني ينفع أجي أقدم “التوك شو” بالبنطلون بس؟ وأقولكوا معلش أصل الجو حر أو أنا بعمل موضة؟”.
وأضاف: “مش عارف ليه الموازين في دماغ الناس مش منضبطة ليه؟ خصوصا لو مش محتاج، مع فارق التشبيه زي لما تلاقي حد بيسرق وتظبطه وتكتشف إنه مليونير.. بتسرق ليه يابني؟ أهو كده.. طمع.. إنما تلاقي حد تاني بيسرق فيطلع بيسرق عشان يلاقي لقمة عيش ياكلها، السرقة حرام في كل الأحوال”.
وأردف: “فاللي مش محتاج المفروض ميعملش “بالو”، اللي يعمل كده حد صغير أو نكرة أو مش معروف وعايز يعمل تريند أو عايز يعمل حاجة استثنائية عشان الناس تشاور عليه”.
واستكمل مشيدا بالفنان محمد رمضان و بموهبته: “إنما لما تبقى نجم النجوم وواحد من أهم النجوم وأكثرهم شعبية ونجاحا ومالا، فيبقى لزمتها إيه إثارة الإثارة؟ والإتيان بأفعال تجيبلك الكلام والانتقاد إلا إذا كنت كييف، اللي هو أنا عايز أعمل كده عشان تامر أمين يطلع يقول عليا كده، إنت مش محتاج يابني”.
وأردف: “ده الموهبة الجميلة محمد رمضان، هو في واحد يعمل مسلسل جعفر العمدة ويبقى محتاج حاجة بعد كده؟ المسلسل اللي تحول لظاهرة اجتماعية، والمجتمع المصري والعربي كان بيتكلم عن جعفر العمدة وسيف ابنه”
وأضاف: “مش عايز أبقى قاسي بس القسوة دي هدفها الحب، عشان الموهبة العظيمة دي حرام تروح في كلام فاضي زي ده، خلي نجاحك هو اللي يتكلم عنك”.
حفل محمد رمضان في الساحل الشمالي
وكان أحيا محمد رمضان حفلًا مؤخرًا ضمن حفلات موسم صيف في منطقة الساحل الشمالي، بحضور عدد كبير من الجمهور ومحبيه.
وشارك رمضان، مقطع فيديو وهو يظهر فيه عاريًا على المسرح، وذلك عبر حسابه الشخصي بموقع تبادل الصور والفيديوهات إنستجرام.
أعمال محمد رمضان
ويعرض حاليًا للفنان محمد رمضان فيلم ع الزيرو في جميع السينمات بمصر، والذي يشارك به ضمن منافسة موسم أفلام صيف 2023، والعمل من بطولة الفنان محمد رمضان، ويضم فيه مجموعة من الفنانين، أبرزهم نيللي كريم، جومانا مراد، إسلام إبراهيم، شريف دسوقي، الطفل منذر مهران، والعمل من تأليف الدكتور مدحت العدل، وإخراج ماندو العدل، ومن إنتاج العدل جروب.