ردت الإعلامية ياسمين عز على تصريحات الفنانة مايان السيد عنها والتي كانت قد أدلت بها على هامش المؤتمر الصحفي لفيلم “هاشتاج جوزني” .
حيث تلقت مايان السيد سؤالا من أحد الصحفيين عن ياسمين عز ورأيها في تصريحاتها عن العلاقة بين الرجل والمرأة، لرتد مايان قائلة: “لا تعليق .. مش هساعدها تشتهر، مش هتكلم عنها” .
وعلقت ياسمين عز على ذلك خلال حلقة السبت من برنامجها “كلام الناس” المذاع عبر قناة “MBC مصر” دون ذكر اسمها قائلة: “فيه مثل أنا بعمل بيه اسمه إيه، من دق الباب لقي الجواب .. من وجهة نظري الرد 3 أنواع، رد بالتجاهل، رد بقلة الأدب ورد بالأدب” .
تابعت: “أنا هختار إني أرد بالأدب لإن مبحبش قلة الأدب مع إن مفيش اسهل منها، ولأن اللي بقوله وبطبقه على غيري لازم اطبقه على نفسي أولا .. لما تكوني لسه مبتدئة في حياتك المهنية ولسه بيكتبوا اسمك بالقلم الرصاص حاولي متخوضيش معارك مجانية” .
أضافت: “متخلقيش لنفسك أعداء بدون داعي .. مش ذنبي إن الصحفي ملقاش عندك تاريخ مهم أو حاجة مهمة يسألك عنها فسألك عني، وبدل ما تتكلمي عني كنتي طلبتي بكل احترام وتهذيب إن الناس تسألك عنك انتي وعن شغلك مش عني أنا” .
واصلت ياسمين عز: “انتي بنت ظريفة حاولي انك تشتغلي على نفسك أكتر وتعملي أدوار مهمة وحلوة وتصنعي تاريخ مهم يخلي الصحافة الفترة الجاية تسألك عنك انتي مش عني أنا .. احنا مش ملزمين نحب بعض بس مجبرين نحترم بعض” .
واختتمت: “احمدي ربنا إن ربنا وقعك فيا المرة دي، أنا عموما مبردش خالص ..مرة تانية ممكن تقعي مع حد تستلمك ليل نهار مش هتخصلي وتأكدي مليون بالمية إن الإنسان لازم يشتغل على نفسه بجد علشان يكون مهم ولما يكون مهم يسألوه عن نفسه هو مش عن ناس تانية” .